Naidheachdan
Tha aon de na Fèisean is maireannaiche ann am Breatainn air program de cheòl eadar-nàiseanta fhoillseachadh airson 2009. Coinnichidh luchd-ciùil bho o Quebec, Èireann, Astràlia agus na Staitean Aonaichte le cuid de na ceòlaidearan as ainmeile an Alba airson cluich air beulaibh luchd-èisteachd à còrr is ceithir fichead dùthaich aig Fèis Cheilteach Innse Gall ann an Steòrnabhagh am-bliadhna.
Mairidh an Fhèis ceithir là bhon chòigeamh là deug chun an ochdamh là den Iuchar agus am-bliadhna cluinnear luchd-ciùil leithid Còmhlan Sharon Shannon, La Bottine Souriante, Còmhlan Mhìcheil MacGoldrick, Còmhlain Bhlàr Dhùghlais, Na Wilders, Karen NicMhathain, Fred Moireasdain agus Le Vent du Nord.
Seo an 14mh bliadhna den Fhèis agus tha e fhathast a' tàladh nam miltean bho cheàrnan den t-saoghal cho sgapte ri Ameireaga a Tuath, Astràlia agus New Zealand. Tha an Fhèis air soirbheachadh thar nam bliadhnaichean a dh'aindheoin 's cho iomallach 's a tha i agus buaidh ìsleachadh san eaconomaidh san fharsaingeachd.
Thuirt Caroline Nicillinnein, stiùiriche na Fèise "Tha sinn air ar n-aithneachadh mar "The Homecoming Festival" o chionns gur e àite a th' ann far am faodar teaghlaichean agus an cuid càirdean tadhal agus tha sin dha-rìreabh freagarrach am-bliadhna. Tha am piseach a tha oirnn fad nam bliadhnaichean gu ìre mhòr an urra ri suidheachadh àlainn, taic nan coimhearsnachdan agus ceòl beò air leth.
'S e tachartas eadar-nàiseanta a th' anns an Fhèis le ceanglaichean làidir tarsainn an t-saoghail sgapte Cheiltich. Tha an Fhèis a' fosgladh leis a' "Megantic Outlaw" aig Calum Màrtainn, mar eisimpleir. Tha e a' bualadh air a' chuspair fògradh bho na h-eileanan agus ar ceangalaichean ri pàirtean eile den t-saoghal leithid Quebec agus bidh iadsan a tha an sàs ann às an sgìre fhèin agus à Nashville. Tha sinn an dòchas gun còrd na tha air prògram na bliadhna ri na miltean a bhios a' tadhal air an Fhèis gach bliadhna."
Thuirt an comhairliche Eairdsidh Caimbeul, cathraiche leasachadh maireannach aig a' chomhairle,"Tha an Fhèis air leth cudromach airson na h-eaconomaidh agus airson cultar nan Eileanan an Iar agus tha a' Chomhairle toilichte taic a thoirt dhi. Tha prògram na bliadhna seo a' tabhann blasad den a h-uile rud a bhuineas do na h-Eileanan.
Tha e na dhearbhadh air cho math 's a tha an Fhèis agus an tarraing a th' aig na h-Eileanan gu bheil luchd-tadhail a' tilleadh bliadhna an dèidh bliadhna .
Thuirt Eairdsidh Dòmhnallach, manaidsear ionadail nan Eilean airson Bòrd Iomairt na Gàidhealtachd "Tha sinne toilichte taic a thoirt don Fhèis, fear de na tachartasan bliadhnail is cudromaiche a th' ann. Chan e a-mhàin gu bheil i na deagh dhìbhearsain aig na làraich eadar-dhealaichte air feadh an àite ach tha e cuideachd a' toirt taic fheumail don eaconomaidh."
Thuirt Sharon Shannon "Tha an Fhèis seo air leth cudromach agus tha mi air mo dhòigh gum bi mi a' cluich air beulaibh luchd-èisteachd eòlach. Tha mi cinnteach gum bi prògram na bliadhna seo cho ainmeal ris an fheadhainn a bh' againn 's na bliadhnaichean a dh'fhalbh."
Thuirt Karen NicMhathain "Tha mi leth thoilichte a bhith a' gabhail pàirt ann am Fèis na bliadhna sa. Tha mi air a bhith ann roimhe le Capercaillie agus the mi a' dèanamh fiughair ri tilleadh. Tha am measgachadh de cheòl, an suidheachadh agus mar a tha e air a chur air doigh, an còmhnaidh a' toirt dhuinn deagh Fhèis.
Thuirt Keith MacMhathain "Tha mise air mo dhòigh an cothrom a bhith agam cuirm "Face the West and Friends" a chur air bhonn agus cuideachd cluich air prìomh àrd-ùrlar na Fèise, rud air an robh mi a' miannachadh fad bhliadhnaichean.
Bidh an fheadhainn a tha air an ainmeachadh gu h-ìosal a' nochdadh aig Fèis Ceilteach Innse Gall 2009
The Sharon Shannon Big Band, La Bottine Souriante, Michael McGoldrick Band, Blair Douglas Band, The Wilders, Karen Matheson, Fred Morrison , Le Vent du Nord, The Chair, Calum Martin's Magantic Outlaw, Box Club, Face the West and Friends, The Ploughboys, Calum Alex and Seonaidh Beag MacMillan, Gary Innes and Ewen Robertson, Norrie MacIver and Sineag MacIntyre and Deoch an Dorus.
Faodar tiocaidean fhaighinn bho 1 Ceitean air-loidhne aig www.hebceltfest.com neo le bhith a' fònadh gu 01851 702333.
CRÌOCH
Airson tuilleadh fiosrachaidh agus dealbhan, cuiribh fios gu:
Peter Kane: 01463 871608; 07742 308213
www.hebceltfest.com
Notaichean don Neach-deasachaidh:
- Tha an Fhèis na 14mh bliadhna agus a' cruthachadh na h-uiread de dh'airgead airson na h-eaconomaidh ionadail. A bharrachd air na bhios a' dol ann an Steòrnabhagh, bidh tachartasan cuideachd anns na coimhearsnachdan air feadh Leòdhais agus na Hearadh.
- Bha còrr is sia mile deug neach an làthair aig Fèis na bliadhn' an-uiridh, 's iad air tighinn à ceithir fichead diofar dhùthchannan.
- 'S iad na prìomh bhuidhnean a tha a' toirt taic dhi, Comhairle nan Eilean Siar; Iomairt na Gàidhealtachd is nan Eilean; Comhairle Ealain na h-Alba. Am measg an luchd-taic eile tha Caledonian Mac a' Bhruthainn, The Le Gouvernement du Québec agus The Co-operative Membership.
- Am measg nam meadhanan a tha a' toirt taic tha BBC Radio nan Gàidheal, BBC Radio Scotland, The Big Issue (Scotland) agus Output Systems Media.
- Gheibhear fiosrachadh mionaideach mu phrògram na Fèise air làrach-lìn na Fèise bho 30 Màrt.
- 'S iad na prìomh rudan a tha a' tàladh dhaoine don Fhèis, an suidheachadh, an ceòl agus an taic à luchd na coimhearsnachd.
